Khaya Mthethwa UKHAYA Mthethwa osekuphele amasonto amabili engekho emoyeni kwiGagasi FM
Image: Instagram
ISIPHENDULIWE imibuzo yabanye babalaleli beGagasi FM ngokunyamalala komsakazi uKhaya Mthethwa osekuphele amasonto amabili engekho emoyeni.
UKhaya ungena ohlelweni i-Midday Connection ngo-12 kuya ku-3 emini phakathi nesonto. Kusuka ngesonto eledlule uDJ Sonic obesebenza naye uyibamba nosaziwayo abehlukene abasakaza njengezimenywa.
Phakathi kwabo kubalwa uThandeka Zulu oyilungu leqembu i-Afro Soul, Ashley Ogle obekwi-Big Brother, DJ Sox, osehlale isikhathi eside kwi-Real Housewives of Durban uNonku Williams, umlingisi u-Asavela Mqokiyana nomculi uSkye Wanda.
Imizamo yokuthola uKhaya izolo ayiphumelelanga njengoba ucingo lwakhe belungabanjwa. Imithombo esesiteshini ithe uKhaya kunohlelo lwethelevishini aluqophayo.
Okhulumela isiteshi uKhulekani Shandu uthe usahlabe ikhefu uzobuya ngoMsombuluko.
Uhlelo amatasa ngalo ngolokuvumbululwa kwabaculi abasha bowokholo olubizwa nge-Gospel Superstars. Kulona uzobe eyijaji ngokubambisana noRebecca Malope noNkateko Maluleke kanti lwethulwa wu-Alphi Sipho Mkhwanazi.
Noma kungakashiwo ukuthi luzokhonjiswaphi kodwa ohlwini lwabaxhasi kuvela i-e.tv. NgoJanuwari kwenziwe izinhlolokhono eGoli, eKapa naseThekwini.
Kuthiwa onqobile uzohlomula ngo-R1 million nenkontileka yokuqopha eGallo Music. Kwenzeka lokhu nje, uKhaya ukhiphe ingoma entsha i-My Hero apike kuyo uJonah Chivasa.